eg har spikka desse pinnene
eg har tend denne fakkelen
eg har hogd ut holer i fjellet
eg har svømd til det djupaste djupet
eg har klatra til den høgaste toppen
utanfor er alt smått, det rasar, vi forvitrar
eg hev vøri meg oppe med sky og ned att til havsens grunde
alt for å finne deg, finne deg, finne deg
alt for å finne deg, finne deg, finne deg
alt for å finne deg, finne deg, finne deg
II
sjå på oss
alt er eit kaos
dei to gutane har omøblert stova
sofaputene ligg på golvet
eg må vere troll
og du ligg på sjukehuset død
eg har nett sagt det til dei
eg har fortalt alt
dei forstår ingenting
og snart skal søstra mi kome
og snart skal eg ta drosje til Riksen
stå på rommet som vart ditt
hamre nevane i brystet på deg
lene meg inntil veggen
III
Det klukkar under jorda.
Forbi slettene, gjennom skogen,
til fjellet, hamrande, hamrande,
gjennom fjell
gjennom fjell
gjennom berg, stein,
til den andre sida
eg står på ei grasslette
kyr, sauar, griser rundt om kring
eg høyrer vatn, men ser det inkje
elvar og bekkar under jorda.
Det klukkar. Det lokkar.
Det må vente. Det må vente.
Eg vil ned, men det må vente. Eg kan ikkje gje meg.
Eg skal ikkje snu meg.
Eg må vidare.
Kryssar ein sump. Sankar eit tre med øksa.
Spikkar ein pinne. Spikkar eit sverd. Spikkar ein spade.
Sola er over meg. Om ni minutt går den ned.
Eg traskar vidare.
Det er berre å gå rett fram.
Det er berre halde fram.
Det er berre å halde ut.
Eg må ut av dette. Eg må ut av dette.
I nakken kjenner eg ein pust. Er det din pust?
I horisonten ser eg dødsrikefjell. Høge toppar, tinder og kilometerhøge fossefall.